Për shkak të pandemisë COVID-19 është shtyrë për një kohë të apacaktuar vendosja e shtatores së Skënderbeut në Prizren.

Kryetari i Shoqatës së Intelektualëve gjithëshqiptar, Ndue Oroshi, tha se qytetarët do të informohen me kohë për datën tjetër të vendosjes së shtatores.

“Shoqata ‘Trojet e Arbrit’ dhe Drejtoria e Administratës e Komunës së Prizrenit, njoftojnë të gjithë qytetarët prizrenas dhe anë e kënd trojeve shqiptare që vendosja e Monumentit të Gjergj Kastriotit-Skënderbeut që ka qenë e planifikuar të vendoset më, 6 maj 2020 në Prizren do të shtyhet”, tha ai, rporton ‘PrizrenPress’.

“Shkaku i shtyrjes është coronavirusi, cili e ka bllokuar jetën shoqërore jo vetëm në Prizren, por në mbarë globin.  Për datën e vendosjes së monumentit do t’ju njoftojmë me kohë. Kjo do të bëhet karshi rrethanave dhe kohës së kalimit të epidemisë si dhe mundësisë së organizimit të tubimeve publike”, tha ai.