Ish-gazetari i Washington Post, R. Jeffrey Smith ka kujtuar kohën kur ai kishte raportuar 23 vjet më parë për largimin e forcave serbe nga Kosova.

Ai kujton se kishte parë trupat e shqiptarëve të hedhur në puse nga serbët. Smith përmes një postimi në Twitter ka shkruar se e njëjta histori po përsëritet tani në Ukrainë.

“23 vjet më parë, unë isha në Kosovë ditën kur forcat serbe u tërhoqën nga Kosova, duke raportuar për WP. Ndër gjërat më të pakuptueshme që u panë atë ditë: Kufomat e hedhura nga serbët në puse. Historia po përsëritet tani në Ukrainë, me trupa të gjetur në puset ku u tërhoqën rusët”, ka shkruar Smith.

Ish-gazetari i Washington Post, R. Jeffrey Smith

Ish-gazetari më tej shtron pyetje se pse po ndodh përsëri kjo gjë, duke shtuar se kjo është një formë primitive e luftës biologjike me trupat që synojnë të helmojnë puset dhe t’ua mohojnë ujin e pijshëm banorëve vendas.

Smith më tej tregon se ishte tronditur nga ajo që kishte parë në Kosovë 23 vite më parë, gjë e cila po shfaqet edhe tani në luftën në Ukrainë.

“U trondita plotësisht nga ajo që pashë në Kosovë, kufomat e futura në puse vetëm disa metra larg. E kisha të vështirë të imagjinoja që njerëzit mund të kishin kaq pak respekt për të tjerët — njerëzit me familje që do të shihnin se çfarë ishte bërë dhe duhet të merrnin trupat. Mjerisht, në Kosovë ajo kalo në një mjet tjetër të degradimit të qëllimshëm: përdhunimin masiv. Dhe kjo gjithashtu është duke u shfaqur tani në Ukrainë”, shkruan Smith.

Smith tutje shkruan se kjo e bën të qartë se kjo nuk është vetëm një luftë për tokë, apo burime, por është më personale për ushtarët e përfshirë.

Ai thekson se ushtarët janë indoktrinuar të imagjinojnë se armiqtë e tyre janë më të këqij se ata, janë nënnjerëzor dhe duhet të degradohen dhe t’u mohohet aftësia e tyre për të jetuar jetë normale.

“Me pak fjalë, ata vetë janë helmuar rëndë. Është e tmerrshme të shohësh që kjo histori të përsëritet”, ka shkruar Smith. /Telegrafi